求驗客手記:基亞連尼百戰意氣風發邦路斯被噓好葡萄

求驗客手記:基亞連尼百戰意氣風發
邦路斯被噓好葡萄

上星期六歐國聯A3組,意大利喺聖西路主場攻極都攻唔入,俾葡萄牙守和0:0,而上季踢AC米蘭嘅中堅邦路斯,就喺出場時俾球迷狂噓,連教練文仙尼都睇唔過眼幫佢講吓好說話,而佢嘅祖雲達斯拍檔基亞連尼,今場就係為國上陣第100場,達到里程碑!

基亞連尼(左)成為第七個有百頂喼帽嘅意軍,真係威!

葡國悶和率先闖四強

意大利今場面對冇基斯坦奴朗拿度(C朗)壓陣嘅葡萄牙,一路採取主動,不過喺五分鐘前鋒恩斯治尼嘅射門,俾葡國門將魯爾柏迪斯奧撲出,恩莫比尼補射竟然高出,而佢去到35分鐘單刀,又俾柏迪斯奧封位救到,真係大嘥鬼。去到下半場,葡萄牙有馬里奧雷爾同祖奧馬里奧先後失機,到補時階段,意大利新星羅倫素柏歷堅尼近門頭槌攻門,都俾柏迪斯奧化解,兩隊就咁賽和0:0。

喺柏迪斯奧撲出多達七次攻門下,葡萄牙提早一輪拎到小組首名,成為第一隊殺入歐國聯四強嘅球隊,下年六月就會喺葡萄牙踢決賽周!葡萄牙教練費蘭度山度士就未講C朗到底幾時會復出踢國際賽,下年34歲嘅C朗,世盃後都未再為國上陣,唔知到時會唔會復出喇!下個月三號,喺愛爾蘭都柏林搞嘅歐洲足協執委會會議,就會為四強抽籤。葡萄牙已經提議由波圖同埋甘馬雷斯嘅主場作為主辦場地,比賽會喺下年6月5同6號舉行,決賽就係6月9號。

邦路斯(圖)重返聖西路被柴台,文仙尼都睇唔過眼。

葡萄牙(圖)和波都率先晉級,球隊上下都好開心。

重返米蘭被球迷柴台

至於邦路斯今年夏天同AC米蘭不歡而散,米蘭球迷憎死佢,今場佢出場同埋每次掂波,都俾球迷噓聲招呼。賽後31歲嘅邦路斯反擊︰「世上總會有啲蠢人,最重要係隊友同教練對我有信心。」教練文仙尼都希望唔會有球迷對國腳柴台︰「球迷噓邦路斯係錯嘅,呢種抗議唔應該喺國家隊比賽出現。」

而另一個祖記後衞,34歲嘅基亞連尼今場就啱啱好第100次代表國家隊上陣,係歷來第七個去到呢個里程碑嘅意軍球員,更加巧合嘅係,14年前嘅11月17號,就係佢國家隊地標亮相嘅日子,當時年僅20歲嘅基亞連尼,喺意大利1:0小勝芬蘭嘅友賽下半場後備上陣。另外六個有過百喼帽嘅意軍球員,就依次係保方、簡拿華路、馬甸尼、迪羅斯、派路同索夫。