香港又老又窮。馬英九說。黨友在旁執生，提醒人在高雄老人院幫國民黨拉票的前總統噏錯。但老馬有火，食住上，硬拖香港落水，高雄與香港呀，差不多，再loop對白都一樣：又老又窮。
777忍唔住黑面神回前，湯渣大叔搶先披甲上陣，對小馬哥喊話，別搞網絡欺凌！喔，原來唔係網上留言，咁樣，姓馬呢位先生，你戴了有色眼鏡啦，想認識香港，跟團參觀吧，保證偉大的港珠澳橋令你O嘴，五尾中華白海豚游來游去，任你selfie！見識一下，什麼是一小時生活圈，大灣區幾咁有希望。高雄的年輕人要北漂咁慘？香港年輕人有阿爺照住，北上無難度，大把機遇等緊佢地，拎埋居住證，方便到呢，日日食鯇魚刺身、歎碳九海鮮、炸非洲豬瘟扒都唔驚！用雞付寶，乜春都買到，包括寶藥，冇老點你！香港做硬大灣區龍頭，由聯繫人升呢做參與者，持份喎，點會窮！新香港回歸廿年，背靠祖國，大海神針，從此免費注射國產Botox，湯渣滾兩滾都會變返靚湯！新香港，發過豬頭丙，靚絕飛鵝山！