【本報訊】馬路如虎口，無論係行人定駕駛人士，都要打醒十二分精神，好似黃大仙呢位男童咁，喺巴士車尾過馬路，懷疑因視線受阻，冇留意駛緊埋嚟嘅的士，而的士亦收唔切掣，結果將男童撞到彈起，真係陰功豬。
事發喺周六（17日）下晝1點幾，讀者黃先生架車駛到翠竹街，等待前面架單層巴士上落客，呢個時候，一位啱啱放學嘅男學生，喺巴士車尾後方嘅行人過路線「頭耷耷」咁橫過馬路，當佢行到馬路中心嗰陣，男童望向右邊，完全冇留意的士正由佢左邊駛近，最終的士煞唔切將男童撞到飛彈上車頭蓋，再跌返落地受傷。
膝頭受傷送院
小記了解過，原來現場附近原本設置一塊可以消除盲點，協助駕駛者睇清楚路面情況嘅凸鏡，但懷疑早前因風災損毀，至意外前仍未修妥。汽車工業學會會長李耀培認為呢次意外，煞唔切車嘅司機同頭耷耷嘅學童都有部份責任。佢認為司機責任較大，因為行人過路線係行人優先使用，如果司機視線受巴士所阻，理應喺過路線前減速以策安全。據警方回應指，男童膝頭受傷，清醒送院治理。