倪匡語出驚人，評論金庸，可以將一個人分成兩個，正是一人兩制，佢講金庸寫小說一流，但做老闆九流，做老闆用查良鏞真名，寫小說用金庸做筆名，金庸名滿天下，舉世讀者無不致敬，查良鏞老闆呢，就意見紛紜咯。左丁山讀大才子董橋寫短文紀念金庸，文字好到無得彈，不過寫金庸就是寫金庸，全文不提查良鏞三個字，真高手也。大編輯在明報做小記者出身，跟過明報周刊雷坡學藝，知道明周曾為明報賺過好多錢，雷坡對明報之貢獻，大到無倫，但大編輯記得，雷坡對金庸小說推崇備至，對查良鏞做老闆，則欲語無言喎。有人講查良鏞不願加稿費，只因佢嘅文章寫得比專欄作家更好，但對明報真正有用之人，出手便是不同，此則要啲明報舊人撫心自問，自己在查良鏞心中，是否有用了，若講對明報生意利潤之有用，應該無人比雷坡更有用。
大編輯在查良鏞出殯之前一日，走咗去沙田文化博物館參觀金庸館，懷念金庸武俠小說一番，大編輯年紀細過左丁山，左丁山睇住金庸小說開始賣紙，大編輯一代已係捧讀武俠小說暢銷書，感受稍有不同，佢哋崇拜金庸程度更甚，又因在明報出身，對查良鏞老闆不願置評，只記得1997年3月22日明報上市之前，公司pink form畀員工優先以招股價認購，大編輯因此買咗幾手。但明報上市後，跌破底價，全部認購員工即坐艇，查先生後來話唔好意思，累同事輸錢，以招股價向員工購回股份，令員工打個平手離場，當時有員工話查生唔話得；點知道，查生不久就宣布與于品海交易，以總代價十億元出售明報股權，查先生賺了一大筆。於是大編輯就領略到何謂高手財技，一般員工那是對手。
呢啲係舊事，唔好多講嘞，大編輯去參觀金庸館，一心只係想住金庸，唔係查良鏞。行行吓畀佢見到有金庸手寫之武林秘笈，大喜過望，立即拍低，傳畀左丁山睇吓，學習學習，原來此乃金庸手諭副刊之五字真言「短、趣、近、物、圖」，金庸大師話辦報紙副刊要緊記！短即文字要短、簡潔，不宜引經據典；趣：要新奇有趣，輕鬆活潑；近：要寫近事，少寫舊事，寫香港事、中國事（想來係要貼地咁解）；物：言之有物，令讀者有所得，大得小得均可；圖：如有圖片圖像更佳。金庸講明五字真言係明報編輯副刊之要旨：「新奇有趣首選，事實勝於雄辯，不喜長吁短嘆，自吹吹人投籃！」大師秘笈，今時今日有幾多人跟住練功呢？