模特兒出身的李月五年前跟好友Mandy Lieu合作搞模特兒公司Quest，自Mandy戀上周焯華（洗米華）並生了三個仔女，在英國專心湊小朋友，已經沒理會模特兒公司業務，公司便由李月打理。下嫁富豪李本勝及生了一對仔女的李月，並不像Mandy以家庭為重，她仍然對事業雄心壯志，繼在北京開設「北京星潮模特兒學校」，最近又花百萬於銅鑼灣開設專為女性而設的健身中心。
少見Mandy
有闊太不做，落手落腳搞生意的李月，全因有老公全力支持，她日前在銅鑼灣受訪時說：「自我做咗運動之後，佢都成日讚我，兩個人有身體接觸，佢都感受到我大腿呢啲位置真係緊致有改善，開健身中心係好事，佢一定支持我。可能我希望自己人生有少少成績，我嘅partner都好好，有佢哋幫手，我有好多時間陪伴小朋友。」Mandy今次有份嗎？李月就說：「同佢冇關係，我都好耐冇見佢，好少聯絡，都唔想打擾佢，佢照顧小朋友都好忙碌。」
快樂運動
32歲的李月保養得宜，她謂全靠運動：「呢兩年運動融入喺我嘅生活入面，𠵱家一星期運動三日，帶嚟嘅轉變好大，帶畀我快樂同能量，好開心，啲人話做運動等如醫學美容，我好認同，所以開健身中心係為咗幫到女性，呢個係我嘅出發點。」
採訪：羅慧敏
攝影：陳慧安
場地提供：Fitness Bee
更多精采時尚內容，盡在 http://add.appledaily.com。