以「Great Again」為競選口號參戰立法會九龍西補選嘅前民協成員馮檢基，補選前最後一周繼續密密拉票，雖然冇政黨支持，但都用咗多架宣傳車周圍廣播，噚日下午八方就喺大坑東道遇到其中一架宣傳Van，但望真啲，架車竟然違例泊咗喺黃色影線區內，現場仲豎立咗多個「停車等候會被檢控而不予警告」嘅路牌。其實阿基上月初報名當日都試過違泊，仲食咗張「牛肉乾」，但睇嚟佢嘅團隊冇喺錯誤中學習，變咗「Wrong Again」。
嗰架貼咗馮檢基宣傳標語嘅違泊Van，車上唔見司機蹤影，車頭位置亦未見有告票，而當時阿基係喺一街之隔嘅大坑東邨出席緊論壇，八方轉個頭則見到馮檢基揸住另一架宣傳車巡區，笑容滿面嘅佢，唔知對車隊違泊知唔知情？其他候選人尚有陳凱欣、李卓人、伍廸希及曾麗文。