巴西上星期五晚喺國際賽憑隊長尼馬一箭定江山，喺阿仙奴嘅阿聯酋球場以1:0小勝烏拉圭。全場唯一入波喺下半場76分鐘出現，丹尼路雷斯俾迪亞高拿索特踢跌博到12碼，尼馬主射12碼得手。不過到完場前四分鐘，卡雲尼回防攔截尼馬，尼馬交足戲痛苦倒地大叫，令卡雲尼被判罰黃牌。
當時卡雲尼已非常不滿，皆因從重播所見佢嘅動作幾乎冇掂到尼馬雙腳，但尼馬誇張嘅演技就博得球證同情，而且心急追平比數嘅卡雲尼，上前想拉起球會隊友尼馬嗰陣，後者仲一手撥開佢，卡雲尼只可以嬲爆掉頭走，而尼馬就對住卡雲尼嘅背影口噏噏。同日另一場國際賽，阿根廷憑保羅戴巴拿喺上半場助攻拉美路富尼斯摩利，同下半場墨西哥嘅比利素爾擺烏龍，以2:0擊敗墨西哥。