17年前，太古坊曾有一間比利時式餐廳，叫做Belgos，以大桶青口、蜆肉著名，肥仔K未去LA讀大學之前，就曾經到Belgos與兩位南加州大學校友及學生取經，學習在LA生存之道。可惜吖，太古坊平時熱鬧，午餐逼到爆，晚上就幾乎空空如也，星期六日晚上更淒涼，Belgos做咗大概一個租約就關咗門。
想不到餐飲M打電話嚟：「喂，Belgos復活，開番冇幾耐，趁未逼爆，你快啲去試吓啲肥美青口、蜆肉。」喺邊度呀？餐飲M話：「舊Inn Side Out舊地址，新寧道，停車場入口就在餐廳過少少，好方便。」聽佢咁講，梗係要去啦，問多句：「係餐廳R自己搞番，還是他人用Belgos呢個名？」餐飲M話：「餐廳R日日喺度打躉，你話呢？」咁就明白晒。
於是趁十一月十一日星期日冇馬跑，中午唔跟親戚去九龍福臨門飲茶咯，搞搞新意思，改為食西餐，搵埋小YY、肥仔K等開車去銅鑼灣，點知星期日都會過海大塞車，紅隧真係冇得救，係要避之則吉嘅，卒之行車一小時先至到達新寧道利園三期（Lee Garden Three），入停車場好方便，每半小時收16元，銅鑼灣市價也（後來知道食餐埋單超過400元，可免兩小時泊車費）。Belgos門口大大，唔慌搵唔到，入到去坐低，十二時半過後，見到有九成入座率，銅鑼灣果然係有生客人流，只見不少星期日顧客係講英文嘅富裕子弟，隔籬枱有一位貌似七八歲嘅本地女孩揸住一本好厚嘅英文書（並非字典）讀得津津有味，於是向肥仔K打個眼色：「你個女輸在起跑線喎！」
睇餐牌價錢中上啦，唔算昂貴，幾啱中產人士，最貴好似係美國肉眼牛扒，14安士賣348元，啲牛肉好靚，值回票價，其他如蜆（必吃）、青口亦好正，全部貨真價實，抵吃之至。甜品waffles（$108）尤其令兒童尖叫搶住食。服務方面中上啦，冇驚喜，起菜快，換碟勤力，只是目測各侍應生，好似唔夠Cheerful醒神，中午已有疲態，唔通星期五晚生意太好，做到攰咗？此則有待餐廳R解釋咯，餐飲M話Belgos平時工作天set lunch只收百零蚊，抵到爛，吸引大量OL及白領階級捧場。食到尾，小YY話：「以前呢度係Inn Side Out ，拍拖男女個個嚟呢間酒吧行，滿地花生殼，氣氛熱烈好難忘記！」以前呢度好似叫做新寧大廈，貝聿銘設計，有啲名氣嘅，只是貝大師不懂香港要求，留下一啲空間，未用盡plot rates，地主希慎換咗CEO之後就拆咗重建，用盡地積比，你係希慎股東就一定讚好。