【電影人語】
早前網上出現一段解構「星馬版《古惑仔》」電影的片段，《古惑仔之人在江湖》變成《新警察故事之人在江湖》，陳浩南變成陳督察混入洪興做卧底。找到這隻陳年影碟的是港產片狂迷威哥（袁永康），他說原來好多港產電影都有隱藏片段！
38歲的威哥，自細愛看電視和錄影帶，「細個都係睇《430穿梭機》為主，阿爸每個星期會帶我入戲院，又會租錄影帶返屋企睇，越睇越鍾意港產片。」那時還是周星馳「黑白殭屍」年代的《430穿梭機》。威哥因愛香港娛樂圈，去電視台做助導，由朝到晚浸淫在香港電視、電影中，現在呢？依然在電視台工作，「而家冇咁留意港產片，對上一套覺得幾好睇嘅已經係三年前嘅《五個小孩的校長》，我都覺得有少少對唔住香港電影，不過興趣真係冇以前咁大。」
迎合各國市場改劇情
威哥：「最鍾意梗係80年代至90年代初港產片，我比較鍾意喜劇，麥嘉嗰啲，五福星嗰啲，之後周星馳，再之後……張家輝都OK嘅。當年香港電影界嘅感覺係好熱鬧，好有娛樂性，紅到去東南亞、日本、韓國。」他家裏收藏的影碟、影帶過萬套，還有大量周邊產品，「好多都係後追嘅，啲電影特刊嗰啲，好多係喺日本搵返嚟，當中有我最鍾意嘅王祖賢，仲有陳年嘅《靈幻道士》，即《殭屍先生》系列，改編日本漫畫嘅《孔雀王》啦，徐克嘅《妖獸都市》啦，當年日本漫畫改編真人版電影都係港產片嚟，可以想像到港產片喺日本都有一定影響力。」是的，《靈幻道士》當年更推出過任天堂紅白機遊戲！超大量珍藏，還有沒有閒時回味？「而家諗住將屋企嘅錄影帶燒做碟，不過好大工程，唔知幾時可以完工。」
台版賭俠2加長換如夢
曾幾何時，港產片市場除香港外，東南亞、台灣、日本、韓國都有港產片迷，有現在感覺很陌生的「賣埠」考慮，主要市場並非中國大陸十幾億人，所以為迎合不同市場，港產片會推出不同版本。
愛儲電影，更愛研究不同版本有甚麼「隱藏劇情」。「早前嗰套星馬版《古惑仔》變咗《新警察故事之人在江湖》，其實細個都聽過，不過啱啱搵到隻碟，於是就拎出嚟講吓。因為新加坡嗰邊嘅電影唔可以歌頌黑社會嘛，所以陳浩南就變咗做陳Sir，入洪興做卧底，仲成日要返跑馬地警署報告，結局冇做銅鑼灣揸fit人，但就升咗做督察。嗰隻星馬版《古惑仔》竟然是來自一位德國朋友，「好耐之前喺網上識嘅，佢好鍾意港產片，但唔係成龍嗰啲，而係鍾意睇吳耀漢、伊雷，佢成日叫我幫佢買碟。早前佢就有堆碟問我要唔要，當中就有呢隻。」影片可在他的facebook專頁「威哥會館」看到。
除星馬版外，還有台灣版，「當年去台灣上嘅港產片都會加長，因為喺台灣片長超過兩個鐘，票價係可以加嘅，所以好多片段香港版都未睇過。」例如《賭俠》，「香港版當劉德華同周星馳上賭船時，單立文即係侯賽因同佢兩個講：『上一次仲未夠出醜，仲夠膽嚟？』上次？香港影迷可能冇印象乜係上次，但其實台灣版喺電影頭段有場戲，單立文佢哋去咗上山先生間屋扮賭俠，當時柯受良就扮龍五，之後喺嗰間屋遇過劉德華同周星馳，所以喺賭船係見第二次。」
還有《與龍共舞》，「詳細唔記得太清楚，但多咗好多劉德華同張敏嘅感情戲。」再來有《鹿鼎記》，「香港版當周星馳飾演嘅韋小寶富貴咗之後，返去搵佢家姐吳君如，吳君如拎住碌棍，原來前面有一場戲係李家鼎演嘅龜公想趕佢走。」還有《賭俠2之上海灘賭聖》，「當年都幾多人講，就係原來仲有一個版本唔係鞏俐做女主角如夢，因為當時中國同台灣局勢都幾緊張，所以台灣版見唔到嚟自中國嘅鞏俐，而係由台灣演員方季惟演。」當時要拍兩個版本！「當年有傳過話鞏俐嚟唔到香港，香港版都會由方季惟演女主角，不過後尾終於嚟到。」
日本Bookoff尋特刊
港產片威，連帶廣東話都好威。「嗰個年代，喺日本有好多講港產片嘅雜誌，仲有以港產片對白嚟教廣東話嘅書！例如《大內密探零零發》嘅『最佳男主角就係阿發外父』嗰幕，都有晒拼音同日文嚟講解。」所以近年威哥去日本都會去尋寶，「日本每套電影喺戲院上都有特刊賣，我就搵番當年港產片上映嗰啲，好似近啲嘅有《少林足球》。」說到尋寶貼士，威哥說可以去連鎖書店Bookoff，邊間多呀？「我都係逐間摷。」唔好收收埋埋喎，邊間多呀？「唔，有時去神保町啦。」東京千代田區神保町Bookoff，下次去開秋葉原可以順道去埋。
星馬版《新警察故事之人在江湖》
台灣版《賭俠2之上海灘賭聖》
facebook︰威哥會館
採訪：陳孝義
攝影：伍慶泉
（部份圖片由facebook專頁「威哥會館」提供）