十幾二十年未見嘅吳錦祥醫生，退休後早已在夏威夷隱居，得閒就去探吓兒子、孫兒，但久唔久就會返港探母。呢次回來，居然仲記得左丁山之手機電話，約定早上去中環中心之Pret A Manger飲杯茶傾吓偈。之前仲寄來一部讀書生活回憶錄，叫做「星星之火──我的港大歲月」。
吳錦祥在喇沙畢業後，1967年入讀港大醫學院，住利瑪竇堂，1972年畢業，76年移民美國，1986年得哥倫比亞大學流行病學博士學位；89民運後，曾幫忙不少流亡美國之中國學生在紐約融入美國生活。讀書時，佢在港大，左丁山在新亞，彼此並不認識，當年只同一位港大醫科生徐永祥（學聯會會長）因學聯活動關係，混得好熟，其實吳錦祥亦熱中於學生活動，做過港大醫學會會長及港大校務委員會第一位醫學生代表。佢本書有不少篇幅講港大宿舍生活，利瑪竇堂點滴，可惜左丁山雖然有不少中環朋友係利瑪竇堂舊人，聽古仔聽得多，但始終是局外人，無法投入。書中用不少篇幅講解Ricci仔與U Hall宿生大鬧搗亂康寧堂事件（1970年），此事當年轟動港大，也曾惹來南華早報及明報的報導，令港大校長樂品淳成立調查委員會徹查其事，換轉是在今天，一定成為蘋果日報頭版報聞。
不過那時候港大威望高，校方調查，報紙少理，後來校方判Ricci仔罰款了事（涉案者罰150元，其他人罰100元）。記得前些時與地產商董事F吃午飯，他也是Ricci仔，七十年代中畢業，他說當年有港大生在水街吃宵夜打架，警察到場拉人，得知他們是港大學生後，便立即釋放了事，因為港大學生是天之驕子也。
四十多年後，大學生地位大大不同了，今天大學生夠膽在街上打交，一定成為「醜聞」。吳錦祥說畢業前參加中文成為法定語文運動，保衛釣魚台運動，港大與中大學生開始產生中國情懷，71年12月港大學生會會長馮紹波（經濟日報老闆）率領港大學生回國訪問，為期一個月，學習了文革打倒官僚主義，反走資貫徹毛主席的指示，從此香港學運急劇向左轉，直至1976年打倒四人幫，天真的香港大學生受到嚴重心靈打擊為主。不過一些聰明人就順水推舟，76年後到中國發展關係，卒之吃了中國改革開放的頭啖湯，今天已經印印腳上岸去了。講起這些舊事，如一場春夢，吳錦祥由一個標準喇沙Ricci仔，以為讀醫科搵銀容易，誰知大學生活令他經歷到政治洗禮，壯年又遇上六四事件，令他沒有走上港大醫生發達的道路，回首前塵，只能信命。