講起爆炸頭，車路士球迷當然就會即時諗起大衛雷斯同埋韋利安，阿仙奴球迷就會聯想到新秀古安杜斯，而曼聯嘅代表當然係比利時空中霸王費蘭尼。不過呢一切都已經成為過去，事關費蘭尼轉咗新形象，喺31歲生日之前鏟平爆炸頭，即時霸氣盡失！
高柏尼笑指「P圖嚟嘅」
費蘭尼下個禮拜四就迎接31歲生日，佢禮拜三就喺ig上載近照，顯示佢嘅招牌爆炸頭消失咗，換嚟嘅係清爽平頭裝。可能球迷會問，費蘭尼係咪受咗打擊，先至一嘢剪平頭裝？佢就冇講自己係咪受到打擊，只係話「新一年新形象」，仲加咗個「生日」嘅Hashtag，似乎想轉形象之餘，仲想轉吓運。
其實費蘭尼由標準列治出道嗰時已經留住爆炸頭，去到愛華頓同曼聯都冇大改變，只係試過梳過吓辮子頭，佢前幾年仲將個頭染金咗，化身成為金毛獅王。值得一提嘅係，年初佢同雜誌《GQ Style》拍寫真時，就將自己嘅爆炸頭紮咗做兩個髻，搞到成隻米奇老鼠咁，更加成為網民熱話。
話晒睇咗個爆炸頭咁耐，費蘭尼嘅一班隊友都好震驚，比利時國家隊隊友高柏尼仲好幽默咁話「一定係改過圖，肯定唔係真嘅」！梅頓斯同艾歷拜利都話一時之間接受唔到囉。
韋素開心做比利時唯一
但另一邊廂，同樣以爆炸頭聞名嘅多蒙特中場韋素就好開心，因為已經冇人同佢爭比利時第一爆炸頭嘅美譽，佢仲好得戚咁話：「從此之後，比利時只係得一個爆炸頭！」
講番正經嘢，費蘭尼因為腹股溝受傷，冇獲比利時教練馬天尼斯徵召入隊出戰歐國聯。但離奇嘅係，費蘭尼喺禮拜日嘅曼市打吡正選上陣，但明顯唔喺最佳狀態，而曼聯最終以1:3落敗。有傳媒話紅魔同比利時爭用費蘭尼，不過馬天尼斯就話冇咁嘅事：「能夠見到佢踢晒90分鐘，真係好奇妙，對於我哋嚟講都係好事。」