兩年前立法會選舉，八方最深印象係自由黨嘅周永勤突然喊住話要棄選，嗰時佢話收到段錄音，錄到何君堯（左）嘅選舉義工黃四川（右）話會狙擊佢，所以先決定棄選。
猶記得何君堯事後喺大學校園論壇話同四川唔係咁熟喎，點知隔咗兩年，四川出事，當年話同四川唔係咁熟嘅何君堯，出手幫助噃。
事緣四川喺1998年同地產代理監管局申請牌照時話自己冇案底，冇涉及欺詐性、舞弊或唔誠實，實情佢早喺1995年就衰過藏有偽造駕駛車輛文件罪，直至前年四川仍話自己冇案底，監管局嘅職員同年年尾先發現，轉介警方調查。四川話1996、97年喺黃大仙遇襲，失咗憶先話自己冇案底，又話有保安可證實。
警方查完，冇黃嘅入院紀錄，亦搵唔到個保安噃。四川認咗12條申請地產代理牌照續期時提供虛假或誤導資料罪，被罰款三萬六千蚊，佢搵到唔係咁熟嘅何君堯，今次幫佢寫求情信呀。