網上流傳三色的士，同時出現喺觀塘玩飄移，先不論條片係真定假，小記都要提提大家，紅色的士是所謂「市區的士」，係可以喺香港大部份市區地方接客；綠色的士就係新界的士，主要在新界東北部（即沙田以北）及西北部（即荃灣以北）營運；藍色的士就係大嶼山的士，當然只可以喺大嶼山同赤鱲角載客行走，而三種的士都可以同時前往機場同迪士尼樂園，如片中同時喺觀塘出現，一般嚟講應該冇乜可能。
驗車時例外
根據《道路交通（車輛登記及領牌）規例》，無論個客想前往邊個地區，的士車主或司機都唔可以將綠的或藍的，駛離許可地區以外嘅的地方。不過呢條法例，都容許綠的及藍的，喺一個情況之下，離開指定嘅經營範圍嘅，就係驗車嗰陣喇，但前提係唔可以載客，而車頭亦必須放有「暫停載客」嘅告示。