利物浦前鋒穆罕默德沙拿，近日喺個人ig story上載咗自己做完gym嘅爆肌相，平日真人不露相嘅沙拿，原來六嚿腹肌媲美祖雲達斯球星基斯坦奴朗拿度（C朗），似乎充滿挑機嘅意味。
喺利物浦周日英超主場2:0輕取富咸射入一球嘅沙拿，近日飛返埃及參加國家隊對突尼西亞嘅非洲國家盃外圍賽事，雖然因為落大雨被迫留喺酒店，但沙拿都冇偷懶去咗健身室做gym，做完後當然唔少得自拍post上ig story。由自拍可以睇到，原來沙拿係禾稈冚珍珠，擁有一排非常結實嘅朱古力，簡直同C朗有得揮。C朗不嬲都唔吝嗇同大家分享佢一身完美嘅肌肉，佢喺祖記上周三歐聯分組賽鬥曼聯，下半場入波後又揭起件波衫慶祝，露出六嚿朱古力，令球迷大飽眼福。至於曼聯中場連格，見到C朗咁做亦有樣學樣，仲講笑話同佢鬥腹肌喎。