相傳手炒茶葉味道特別甘醇，一間食店嘅女店員被市民拍到，戴住手套徒手在鐵板上炒麵，炮製「炒麵兜亂」，手法非常熟練，面無半點表情。網民戲言女店員製作「正宗手炒麵」，但應該要注意食物衞生。《蘋果》打電話去食店查詢，職員只係回應唔清楚。
網民：情況普遍
上載片段網民指事件發生喺鰂魚涌一間食店，拍到食店嘅廚房入面，有一個着住圍裙，戴上口罩、勞工手套及膠手套嘅女店員，雙手充當鑊鏟，喺鐵板拎起一大團麵團，不斷兜亂翻炒，其間有白煙冒出，但女店員若無其事，一啲都唔覺熱。
有網民指飲食業內情況普遍：「好多時都係咁炒出嚟，已有好耐歷史，都是咁炒出嚟嘅，唔係今時今日嘅事喇 」，但有網民批評污糟，見到都肚痛，「真係黐線，咁都得，你食喇，對手套都唔知掂過啲乜」。