入行方法有好多種，新秀選是其一，年僅19歲、憑《全民造星》爆出的姜濤，以一張年輕版彭于晏萌爆面孔，附加派心心招牌動作，成功奪取少女歡心，不過姜濤自揭因自卑感與異性有距離感，就算現在多了女仔想認識他，也因工作忙，沒時間理會。而亞軍陳卓賢（Ian）及季軍楊樂文（Lokman）前者歌精、後者舞勁，卻因姜濤走勢凌厲感到酸溜溜。
姜濤、Ian和Lokman三子日前接受訪問，大家都關注姜濤會如何運用百萬元現金，他指會請隊友和監製花姐食飯，至於真正怎運用仍未想到：「人生未試過有咁多錢喺手。」已率先有實質工作的姜濤，既拍廣告又接劇，其實他本身想成為一位跳唱歌手，但由參賽至今一直成搶手貨，還未有時間消化一切，所以去向未定，他說：「平常心面對，越得到多嘢，越要謙虛，唔好覺得自己好多選擇，俾人覺得你囂張，客觀啲去睇到底邊度啱自己。」
厭派心心
拍攝當日，姜濤應要求勉強地展示送心動作，並一臉稚氣指：「我自己都厭，大家快啲反對呢個動作。」當外界以為姜濤很有女性緣時，他卻自揭懂事以來總和異性無緣：「好有距離感，有種自卑感，我性格覺得自己襯唔起人，嘢都唔想同人哋講，𠵱家多咗女仔想認識我，但工作好忙，冇時間去識女仔，同性朋友投緣啲。」
姜濤走勢凌厲，被忽略的Ian和Lokman，難免有種酸溜溜感，但兄弟情戰勝虛榮心，Lokman坦言：「少少酸啦！又係你……」姜濤反安慰二人：「正常㗎，換轉係我都會，自己做嘅嘢好似冇意義，呢行好現實，唔係你做到就係好，同運氣都有關，所以我理解佢哋感受，唔會怪佢哋酸，將心比心都會有。」Lokman則大方說：「我哋都各有粉絲，接收到好多愛，愛大過酸好多。」
儲錢結婚
Ian和Lokman都因比賽而受惠，支持者有增無減，Lokman開心謂：「多咗萬幾人follow我Ig，出街都有人搵我影相。」他之後更有份演出《狂舞派》續集。三人之中以Lokman言行比較穩重，幕前經驗比其餘兩位多，他希望繼續演戲，跳舞雖是強項，但只會視為興趣，名草有主的他，有意計劃結婚，不過要儲夠老婆本。Ian是評判眼中歌藝最好的學員，他個人目標是成為歌手：「唱歌係首選，最希望出到唱片。」
撰文：卓寶花
攝影：沈健程