【黑鏡線索】
上次介紹新書《It Doesn't Have to Be Crazy at Work》嘅背景，今日講多少少內容。
種植物，兩個基本元素，種子同環境。好多CEO非常關心請勁人（種子），但係唔係好關心搞好個環境，可能因為盲搶人刺激啲，或者快速啲，相反整好個環境，要有耐性，冇乜捷徑。環境唔掂，大家返工自然會癲。
環境唔係乜嘢乒乓波枱，或者帶狗返工。呢啲係環境一部份，但只係表層，唔係核心。環境嘅核心，係文化。文化兩隻字好似好虛，實際啲講，公司就係成員每日做嘅決定嘅總和。要做得好，最起碼，各人要大方向一致，方法亦都盡量一致，減低合作之間嘅損耗，例如溝通困難，或互相抵銷。道理上，你可以好似寫program咁定好晒做決定嘅方程式，但現實裏做唔到，惟有提供一啲粗粗哋嘅規矩，等人類同事之間可以粗粗哋跟住做決定，令大家做嘅事粗粗哋對到口。
規矩喺邊度？要公開
舉個例，幾篇前提過，我哋公司有個規矩，凡係有Off the shelf solution可以解決嘅問題，就優先考慮畀錢用，而唔係下下走去叫公司同事DIY。
有人問，規矩定咗之後，點樣令同事肯跟？首先，先唔好假設同事唔肯跟，先問問，一個好肯跟嘅同事，容唔容易跟得到？例如，如果根本啲規矩冇寫低，又或者寫咗但好難搵到，咁可以點跟呢？如果有人唔明點解有呢條規矩，會唔會有地方寫低個解釋？假設有同事有心跟，但新嚟新豬肉跟唔得晒，咁其他人係就咁一句叫佢點改，抑或係指出其實有條規矩喺邊度？
呢啲就係環境嘅重要部份。講咗唔寫低，即係好似，用Snapchat self destruct messages寫合同，你會唔會？寫咗唔跟進，咁又點樣幫有心跟嘅人改善？
Amazon嘅Jeff Bezos，成日話佢每日做嘅，係鞏固公司文化，我信。Amazon規矩有寫低，容易搵到，唔單止員工睇到，你路人甲咁上Google搜尋'amazon leadership principles'，會見到14個大原則喺佢網站列埋畀你睇，而最重要係，呢啲原則係做到入血嘅，係performance review嘅好大部份。
搵中間平衡？講技巧
有人以為，幾萬人嘅公司先要咁樣做，但其實有管過中小企嘅人就一定知，二十人以上嘅團隊，同事共事之間嘅損耗，已經可以令公司舉步維艱。但我哋經驗，多過一個人，都已經好值得做。再推多一步，就算得一個人，今日嘅你同前日嘅你，或者扮演marketing嘅你同扮演product manager嘅你，中間要有連貫，都已經值得做。
有一個重點，係CEO自己一定要跟，甚至更加要跟，事關好多時規矩係自己有份定，點解唔跟。更重要嘅係，規矩係用嚟令事情不致太偏差，而成間公司，有權力造成最大偏差嘅人，就係CEO。我自問有時都想走捷徑，係人之常情，如果the right things咁自然會做到，呢度成個討論就係廢嘅。
當然，你可以話，做得太盡，咪即係官僚主義、規條主義。係，去到極端，係可以本末倒置，不過極端地口述歷史、self destruct messaging，都係死路。要搵中間平衡，係講技巧，但有乜值得做嘅嘢係唔使技巧？開咗個頭，用心做嘅話，總係可以令個環境土壤越嚟越好，大家越嚟越唔癲。
撰文：宋漢生