上星期六入到馬場，老友雲集，未開跑之前，老友A講：「特朗普選舉後會否軟番少少呢？佢搞貿易戰就搞親我間廠，做完聖誕訂單之後，依家望天打卦呀，問銀行撲水又難，真係得個捱字。」把口話捱啫，咪又每次跑馬都見到佢，若非以前賺賺埋埋有底子，就唔會有心情到馬場小注怡情咯。左丁山醒起中銀監兼保監郭樹清明令所有銀行之新增貸款，要有50%借畀民企，民企會有條水喉射住，唔怕啦。呢位老友笑幾聲之後講：「左丁山你內地經驗少，唔明嘅嘞，內地貸款，素來國企第一，大民企第二，內地設廠港企往往排在後面，因為民企老闆比我地更識應酬內地賓架搞私人關係，呢樣唔駛講得太白嘅，我間公司主要與本港銀行來往，香港賓架樣樣睇數據，少好多人情味㗎。再者，何謂新增貸款？如果銀行唔做新貸款，咁就何來新增貸款？操控權在銀行手上，郭樹清唔通再要下硬指標，話明每年必須創造新增貸款若干萬億元人民幣？」
哎吔，咁複雜，講番馬好過，點知佢又問：「習特阿根廷之會，傾唔傾得掂呢？」咦，是日出門前睇咗「金融時報」頭版，報導白宮首席貿易顧問拿華路直斥華爾街大亨（高盛、黑石等等頭頭）不要做北京說客，向白宮施壓與中國談和，警告嗰班大亨唔好阿吱阿咗咁在特朗普面前為中國講好說話。上個月，王岐山邀請美國大銀行及對沖基金嘅主席、CEO或高層代表到北京見面，美其名曰交流意見，實則係要呢班金融大亨回國發揮「影響力」，其中Blackstone主席Stephen Schwarzman（猶太人，耶魯學士，哈佛MBA，東岸精英典範，有中文名字蘇世民，2013年捐款一億美元成立獎學基金，資助全世界學生到清華大學，至今已籌款捐贈清華多達三億美元）更成為華盛頓與北京之私人通話渠道。拿華路係著名反華鷹派，呢次公開大罵華爾街（主要係猶太人控制），顯然係想貿易戰持續至中國投降為止，諗起呢樣，就對老友講：「特朗普炒人唔眨眼，如果見到佢炒拿華路，中美貿易戰可解！」
講完一大輪先至上廂房坐低，靜下來，諗吓「一片光明」久休復出，跑樂聲盃唔會夠跑，買二百元W P算數。後來在其他場次輸多贏少，去到第10場有14號「友誼之星」，乃陸羽董事長冼為堅博士愛駒，45倍，照樣捧場買連贏位置Q全餐，「友誼之星」竟然真係爆大冷勝出，收錢時不禁笑哈哈，是日反敗為勝，全憑友誼也！