工會中人，一向都義字當頭。國泰空中服務員工會（FAU）過往經歷幾次工潮，都多得李卓人做後盾，力撐到底。今次阿人參選立法會九龍西補選，就係FAU知恩圖報嘅時候，今晚拉大隊義助阿人洗樓，去長沙灣邨同埋麗閣邨拉票。FAU主席胡綺薇（Vera）希望阿人能重返議會，「因為佢係唯一真心為打工仔發聲」。
Vera記得同公司打過多次硬仗，好似2007年底國泰收緊員工醫療政策，2015年就加薪及法律保障馬拉松角力，「每次有事，人哥都第一時間出嚟撐我哋」，出謀獻計，又動員其他工會支持，「沿途有佢一直幫我哋」，心存感激。
所以今次補選，FAU亦義不容辭，既拍片力撐，又洗樓助選，仲全力呼籲係九西選民嘅會員，票投李卓人。知恩圖報，果然係義氣仔女。九西補選候選人有伍廸希、曾麗文、李卓人、馮檢基、陳凱欣。