英超今季首位被炒領隊終於揭盅，之前傳過好熱嘅有摩連奴、賓尼迪斯同曉士，但原來統統唔係，而係家陣喺聯賽榜包尾嘅富咸領隊祖簡奴域，但佢被炒都唔算最震驚，而係球會竟然請到2015/16球季帶領李斯特城奇蹟捧起英超嘅雲尼亞里接掌帥位。
富咸今季由英冠升上英超，但12場聯賽後僅得五分排包尾，尤其防守極差，失咗31球係廿隊之中最多，而且最近各項賽事已經連續四場冇波入；畢竟班主卡漢今個夏天畀錢買到舒賀爾尼、阿歷山大米祖域同占舒利呢班球員，結果球隊都仲要包尾，所以怒炒祖簡奴域都可以話係合情合理。
對於新上任嘅雲尼亞里，卡漢就讚口不絕，話如果唔係搵到咁有經驗嘅主帥嚟教，佢都唔敢貿貿然炒祖簡奴域。不過，富咸就冇公佈雲尼亞里簽咗幾年約，佢本人就透過富咸官網話自己好榮幸：「富咸係一間歷史悠久嘅球會，而且𠵱家個陣容充滿潛質，所以我哋個目標唔應該只係護級，而係要成為一支難對付嘅球隊。」當年雲尼亞里接掌李城，都講過類似咁嘅說話，點知教教吓拎埋冠軍，唔知富咸有冇咁嘅運呢？
