特首林鄭月娥向來有個稱號叫做「好打得」，可能大家講得多、林鄭聽得多，搞到佢真係以為自己係宇宙最強。佢噚日喺幾大商會嘅聯席午宴上叫主辦單位唔使對佢咁好，唔使預先畀佢知嘉賓有乜問題，大家可以即管放馬過嚟咁話。
話說林鄭噚日致辭並答咗好幾位台下嘉賓嘅問題後，喺多謝大家之餘，就話覺得每年嘅午宴形式都差唔多，所以佢建議主辦單位唔使對佢咁好，一早話定佢知嘉賓會問乜，反正佢連準備演辭嘅時間都冇，仲點會有時間準備問題嘅答案呢？
叫商界對員工好啲
八方大膽估計，林鄭咁講或者、可能係出於善意嘅，之但係林鄭咁樣公開講出嚟，主辦單位難道一啲都唔尷尬咩？畀人知道咗佢哋事先向嘉賓通水喎！其次係林鄭真係幾大口氣，又難道天下間嘅問題佢都覺得自己應付得嚟，定係佢覺得大家睇少咗佢呀？
除咗寸嘴，林鄭篇演辭都相當唔客氣。話說台下嘅大部份都係商界人士，林鄭相當坦率，講到勞福問題嗰陣佢話並唔同意話佢啲政策反商界嘅觀點，強調商界可以將心比己，對員工好啲，增加員工忠誠度，最終都係公司得益。之後講到土地供應問題，例牌菜當然包括硬銷明日大嶼，林鄭強調喺香港呢個自由、多元社會，冇嘢係有完全共識，所以政府唔會用呢樣嘢嚟做藉口，會不斷解釋填海嘅需要。佢仲向長實主席李澤鉅講，可能Victor聽到會唔開心，就係香港嘅樓價平穩咗落嚟，唔知Victor聽到，又有乜感覺？
李八方