【本報訊】大Sir鍾士元叱咤政壇大半個世紀，晚年卻惹上官非。照顧大Sir四年多的女看護李慧玲，去年入稟勞資審裁處，指控大Sir無理解僱，最後案件和解收場。李慧玲對本報表示，對大Sir離世感到可惜，她不諱言大Sir脾氣不算好，但後期已續漸改善，今年大Sir生日，她也寄了生日卡和毛毛拖鞋給對方。
「佢對腳成日凍冰冰」
李慧玲自2012年起，經中介公司轉介到鍾士元家中當看護，至2016年遭解僱，大Sir契仔、前律政司司長黃仁龍被指在事件中力勸契爺下炒魷令，李一度打算向黃申索150萬元，及後決定只向鍾及中介公司追討欠薪及代通知金等逾26萬元，其後李接受9萬多元和解，並撤回對鍾的申索。
李慧玲昨接受本報訪問時始知大Sir逝世，「唔係好開心，佢對香港好有貢獻，係一個智者」，她指2016年遭解僱後仍有探望大Sir，「佢去醫院檢查時探過佢，佢出咗院都託我買藥膏，嗰年都有去屋企睇佢，佢精神都OK。」
大Sir本月101歲生日，李慧玲透露寄了生日卡和一對毛毛拖鞋給對方，未知他有否收到，「因為知道佢對腳成日凍冰冰，（拖鞋）已經買咗幾年，準備畀佢，一直冇寄出去，希望佢可以保暖」。不過，她坦言照顧鍾4年多來，對方脾氣不算好，「初初去做嗰時，畀佢鬧到狗血淋頭，真係唔想做」，她其後祈禱，求主讓她有寬容忍耐的心，結果一做四年，後來鍾脾氣也改善，「佢試過同我講笑，話幫我改名，叫我『愚忠』，即係話我好忠心，令我自己都有反省」。
■記者鍾雅宜