解放軍廣東部隊佔領沙頭角土地，如何拆局？
林鄭失笑講什麼「杞人憂天」這種廢話前，大把跟班爭住幫部隊出聲。嗱，就等於解放軍全副武裝出營，以電鋸和開山刀收拾山竹過後的倒樹，當時新聞訪問到的市民，跟政府和左報腔口一致，都是俾讚都驚俾唔切。
解放軍部隊，a.k.a戰狼，跨過沙頭角河，起埋石橋，往返石橋進出香港，擺到明唔buy多西九餘的一地兩檢！廣東兵哥築橋，視呢條等同港珠澳橋，一樣係偉大建設，這條橋一曝光，難保變成內地團的打卡勝地，帶旺沙頭角，金巴老闆，生意做唔切，司機渴市，人工高過AO，你話，香港明日願景會幾咁金！沙頭角變成翻版東涌，益晒地主，直頭塞錢入鄉紳袋！至於邊境呢瓣，跟八萬五一樣早已經唔存在！佔領中環叫雞寶教授說會令香港一日損失三千五百億，佔領沙頭角二萬呎地不但冇損政府手，還直接將明日大嶼炒熱N倍。係呀，再唔填海，解放軍等得唔耐煩，新界地逐塊「理順」為「緩衝區」，嘿，當年頂撞過林鄭發展局長的囂張鄉里，劈價幾多球，才賤賣得出祠堂？