家陣要做立法會候選人，除咗政綱、辯才，形象戰都好重要，八方誠邀香港著名時裝設計師鄧達智點評5位候選人嘅形象工程，鄧達智話建制派代表陳凱欣衣着最出色，「親民而不失專業」，但宣傳品旗幟空洞、流於一張美女圖，反而民主派代表李卓人宣傳單張見心思，畀人感覺有抱負有前瞻，至於縱橫政壇多年嘅馮檢基嘞喎，鄧建議對方要考慮吓有冇張唔會令人覺得老氣過時嘅poster？直言橙綠配色單張，好似巴士公司標誌。
人靠衣裝、佛靠金裝，鄧達智話候選人出席論壇時衣着要體面，落區則應衣着輕便。佢話陳凱欣以綠色西裝外套配黑褲黑高跟鞋出席港台選舉論壇夠簡潔，走專業路線，反觀曾麗文以白色洋裝襯紅色短身外套就「師奶咗啲」。至於男士嘞喎，選擇一般局限喺西裝骨骨或恤衫西褲唔打呔，指李卓人有次出席港台論壇灰西裝配白恤衫「係人都有」，反而阿基嘅紫藍色恤衫stylish（時尚）啲。
馮檢基老氣橫秋
衣着只係第一步，選民有冇興趣進一步了解候選人，鄧達智認為視乎宣傳單張係咪簡潔易明並令人印象深刻，佢讚李卓人黃色底同劉小麗同望向遠方嘅單張設計最佳，「顏色構圖都好夾，望上去係設計好簡潔平實，但吸引人」；雖然「背水一戰」口號唔新鮮，但意思清晰兼專業；反而陳凱欣主要半身照嘅單張只係預期嘅靚女照，加上陳具體目標欠奉亦失分，「（口號）突破界限係乜嘢界限？」。
至於邊位候選人單張最土炮？佢覺得阿基嘅傳單設計較老氣，「佢喺政壇咁耐，大家對佢個名都好熟，真係可能要考慮一張唔會令人覺得老氣過時嘅poster」。而阿基嘅單張以橙綠色為主調，佢笑言認同如外界所指似70、80後童年回憶嘅「綠寶橙汁」包裝，更話似新巴標誌；伍廸希同曾麗文嘅宣傳品則太多字、太多訊息，建議相加口號就夠數。
李八方