距離11月25日立法會補選不足兩星期，民主派拉票工作馬不停蹄，被政府DQ剝奪參選資格嘅劉小麗，噚日就以長跑方式，經過包括民主黨、工黨、社區前進同小麗民主教室等組織嘅街站，為代表民主派出戰補選嘅李卓人助選。
小麗同八方透露，其實呢種長跑拉票已進行咗兩星期，有時佢甚至會順路走入食店宣傳，唔少街坊反應都好好。為咗一朝早長跑接觸巿民，小麗原來晨早6點已要起床，跑完下晝仲要參與助選相關會議，夜晚就會去屋邨洗樓，可謂為今次補選博到盡。
邀有心人一齊跑
其實小麗除咗初中時有跑步習慣，過去教書時，亦會喺壓力大時跑步，所以跑步絕對唔會難到佢。噚日長跑拉票時，小麗就見到建制派代表陳凱欣，喺民建聯議員鄭泳舜陪同下拉票，其間小麗就提醒街坊，建制派一直支持倒錢落海興建東大嶼人工島。跑咗近兩星期後，小麗話感到最近選舉氣氛有所提升，唔少街坊都已知選舉將至，佢就最希望嚟緊投票前兩個星期六，有更多有心人加入長跑，齊齊為民主出多分力。其他九龍西補選候選人包括馮檢基、伍廸希同曾麗文。