噚日凌晨4點幾，兩名青年係大埔安慈路昌運中心麥當勞消夜後準備離開嗰陣，啱啱行出門口就中伏遇襲。有5個戴口罩、攞住牛肉刀嘅男人突然衝過去，係咁手起刀落斬向兩人，佢哋就慌忙走番入餐廳避，好彩當時人客唔多，無殃及池魚。
被追斬嘅兩個人，分別姓藍（26歲）同姓李（19歲），佢哋最終走唔甩被刀手追上，兩個都係手腳中刀受傷。刀手傷人後就離開餐廳跳上接應私家車走咗。
由讀者提供嘅現場閉路電視片段，影到斬人經過，片段所見，其中一個口罩刀手追入餐廳，揮刀襲擊一個着黑衫短褲男人，雙方一度糾纏，刀手斬咗幾刀，想走時唔小心跣低，拖鞋男就乘機上前揮拳還擊，點知被對方手持利刀劈中右腳，刀手即急步離開。
稍後，警方同救護員接報到場，將兩傷者送往醫院救治，而餐廳就一片凌亂，現場血迹斑斑，大批警員封鎖現場調查及追捕刀手，案件交由大埔警區反三合會行動組第一隊跟進，暫時無人被捕。
