曾替永亨籌組永亨信用財務的冼國林，後來創辦第一信用財務，生意包括樓宇按揭，需緊貼樓市。近日樓市回吐，反映二手樓價的中原城市領先指數CCL連跌六周，冼國林剛從鬼門關回來，已急不及待睇樓留意盤源，他深信樓價難大跌，「（跌到）幾percent已經好重（利害）」。
批金管局唔識放貸
他認為，業主普遍都有持貨實力，即使有向財務公司借錢買樓的人亦然，成因是拜金管局所賜。
他解釋，以前遇上一名有實力的客人，月薪10萬元，心儀一個800萬元的單位，雖然首期不足，但有能力月供7萬元，只是金管局僵化地要求有關供款不可佔收入逾半水平，以致無法向銀行申請按揭，在財務公司角度，根本不擔心這類人的信貸風險，有好生意做，「我認為金管局成班人係唔識放貸，如果畀我寫本書，一定寫金管局廢！」
他又爆料，認為市場成交少，貨源歸邊，容易出現「造市」。舉例指炒家能控制某屋苑多個盤源時，假設這屋苑的成交呎價一般是15,000元，他陸續找人以呎價19,000元接下數個盤源，令屋苑單位看似出現升勢，其他單位再以17,000元叫價，營造「有筍盤執」的感覺，吸引買家，「以前詹培忠講過，股票做市會俾人拉，地產做市就唔會俾人拉喇！」