邵音音近年拍靈異片居多，不過當年打着肉彈旗號晉身影壇，成為70年代風月片著名艷星，連巨星李小龍都想簽她。邵音音日前接受商台《1圈圈 星光背後》訪問，剖白當年為生活無奈拍脫戲，有血有淚。
唔除就冇戲拍
75年音音姐憑吳思遠執導的《十三號凶宅》一脫成名，自此被標籤為肉彈，不少人認為她為錢出賣身體，但原來另有內情：「記得拍《十三號凶宅》前，冇人同我交代呢齣戲要脫，我只係跟導演指示去做，當時年輕，根本唔知鏡頭可以zoom，嗰個『公仔佬』（影劇照的人）用長鏡頭影咗好多相畀周刊。結果呢部戲上映後，幾乎所有工作都要我剝衫，唔除就冇戲拍。恬妮游說我唔好接觸外界，為錢繼續拍，我係為咗生活拍，每次都好難過。」
直到78年，音音姐因電影《官人我要》成為首位華人女星出席康城影展，頓成傳媒焦點，卻沒料到一夜之間令事業高處跌入谷底，她說：「當年康城影展，我着肚兜去，外國傳媒以China Doll嚟形容我，華語傳媒就繙譯為中國娃娃，我就畀台灣質疑點解要寫中國娃娃，而唔係中華民國娃娃，我被指係地下共產黨員、間諜，馬上就被台灣當局封殺，之後冇傳媒敢採訪我，冇人搵我拍戲，我估係台灣當局搵藉口將香港電影封殺，我就做咗祭品！」
食死貓曾自殺
音音姐坦言回港後曾為此事自殺：「我食咗好多死貓，覺得人生冇意義，我好氣餒，覺得生存唔到。」不過，音音姐在07年接郭子健執導的電影《野．良犬》扭轉命運，首奪金像獎最佳女配角，子女也不再介懷她曾是艷星，令音音姐重拾快樂。
撰文：祖李