香港地有好多大富之家，家族成員多到不得了，好似「銅鑼灣大業主」希慎興業（014），報紙娛樂版、名人版同財經版不時出現利乜乜，大家都知道係希慎創辦人利希慎的後人，但究竟屬於第幾代，跟另一位利乜乜又係乜關係，多數講唔出。
翻閱資料，利希慎有四位太太，共14名子女。早前傳出身體出現狀況嘅利陸雁群（利孝和夫人），佢老公利孝和就係利希慎三子；利孝和女兒利蘊蓮由2012年起，擔任希慎執行主席。跟利蘊蓮同屬第三代又喺希慎董事局嘅，包括利乾、利子厚，同埋利蘊蓮胞弟利憲彬，其中最年輕嘅利子厚都56歲。
至於跟藝人陳淑蘭傳緋聞嘅利承武，就係第四代，佢係利希慎長子利銘澤個孫。睇到呢度，頭暈未呢？今日利園三期開幕，據聞利希慎家族將會有四代同堂出席，即係仲有第五代嘅小朋友出席。唔講唔知，利氏早於95年前買入利園山發展至今，一個家族有近百年歷史而不衰，認真唔簡單。
李華華
mailto:[email protected]