論武功，俗世中不知邊個高！神龍教教主「仙福永享，壽與天齊」，似足修憲永續集權一身嘅習近平？滅絕師太人如其名趕盡殺絕，「明日大嶼」凸顯嘅娥特，不正是一人說了算？棄將梁振英出招狠似西毒歐陽鋒、死心不息卻如慕容復；老好人如老董，驚見岳不群身影？「總舵主」陳家洛同香港「丐幫」副幫主黃浩銘手握武林聖火令，論盡政治江湖圈。
神龍教主 習大大愛被吹捧
同《書劍恩仇錄》紅花會總舵主同名同姓，公民黨前立會議員陳家洛睇金庸小說感受更深，往往政圈人物此中尋，「（中國國家主席）習近平一定係教主，好似神龍教主，好鍾意被人吹捧，『仙福永享，壽與天齊』啱晒佢，改埋憲法，直到永遠，無限復活」。教主要一統江湖，縱武功高強都會坐立不安，「表面風光巴閉箒，其實好怕別人謀權篡位」，中國政壇勾心鬥角處處有，墮馬消息無日無之，恩怨情仇，凶險過江湖。
滅絕師太 林鄭話之你
《倚天屠龍記》滅絕師太表面正氣凜然，實亦權力薰心，心狠手辣，林鄭喺「明日大嶼」一錘定音，總舵主不諱言「滅絕師太最強一點係『我話之你』，林鄭𠵱家要擺明好多嘢，都係靠『我就係道理』」。熟讀金庸小說嘅副幫主亦認同林鄭似滅絕師太，斬殺反對陣營，取締香港民族黨，「諗住攞住一把倚天劍，誰與爭鋒，又係諗住一統武林」。
歐陽鋒 689練上腦
至於《射鵰》內壞事做盡又爭權奪利嘅「西毒」歐陽鋒，副幫主認為同梁振英好似，最後更因倒練《九陰真經》而瘋了，「其實（梁）都幾黐線㗎喇，因為佢日日都喺網上同人鬧交，我懷疑佢有練上腦嘅初步症狀」。風光一時卻淪為棄將，依舊我心不死，「成日都要製造紛爭，喺武林中叉一腳，伸隻手出嚟，想大家對佢念念不忘」，總舵主由此覺得689更像《天龍八部》嘅慕容復：為復興大燕，不惜出賣一切，最終失去靠山，發瘋收場，盛傳或重出江湖選特首嘅689，有冇練神功？
岳不群 老董靠唔住
《笑傲江湖》嘅岳不群，副幫主話全國政協副主席董建華身上見其身影，「1997初期無幾耐，香港人好多都覺得佢係好好先生，董伯伯前、董伯伯後，但係做咗（特首）無幾耐就大家都會知，呢條友係靠唔住嘅」。
李八方