金庸小說歹角多，正派人物亦唔少，現實中可真有其人？陳家洛同黃浩銘不約而同謂現世中嘅洪七公，就係社民連長毛梁國雄。
《射鵰英雄傳》同《神鵰俠侶》嘅洪七公係丐幫幫主，長毛帶領過嘅政黨亦被形容為「丐幫」。洪七公愛美食，長毛則鍾情杯中物；洪七公行俠仗義，睇唔過眼不平事，長毛嘅寫照則係「行無愧作心常坦，身處艱難氣若虹」，黃浩銘話長毛似洪七公係因為佢有俠義心腸；陳家洛則指長毛形神俱似洪七公，「武功相當高強，又閱歷無數，江湖係需要呢啲正義朋友」。
大俠劉曉波腰板挺直
俠義之士又豈止洪七公？喬峰、郭靖比比皆是，陳家洛話內地所有維權人士都似郭靖、黃蓉同喬峰，「面對威逼都可以挺起腰板做人嘅，至少有劉曉波，佢絕對係大俠，面對打壓依然固我講真話，唔係求一官半職，為嘅係社稷」。