一個人上咗年紀，應該定時做身體檢查，更何況係司機，始終揸車期間唔舒服嘅話，唔只害咗自己，其他乘客同道路使用者條命仔都會凍過水。
半分鐘失知覺
好似前日下晝1點幾，將軍澳呢位小巴司機咁，成架車炒咗埋石壆，小巴向右傾側，好彩車上冇乘客咋！意外之後，68歲嘅小巴司機仲可以自行打開車門落車，來來回回咁喺車頭望咗幾次，檢查損毀情況，但根據讀者吳先生拍攝到嘅片段所見，司機行落車唔夠半分鐘，就突然雙腳一軟，挨咗喺駕駛座上面，冇耐仲暈咗跌落地，由於司機俾小巴車身遮擋，一時間冇途人發現，好彩之後有對面線嘅市民見到，跑過去幫手報警。
現場消息指，嗰架103M專線小巴沿寶邑路往將軍澳工業邨方向行駛，去到將軍澳廣場對開時，司機突然暈一暈，之後失控鏟上路邊花槽石壆，救護員到場後將姓郭小巴司機送院，治理後情況穩定。