今個月嘅重頭戲美國中期選舉，上周落畫；壓軸戲中美首腦會晤，月尾開畫，市場用腳投票，彈散格局。月尾「習特會」若講唔掂數，美國明年初就會對中國貨品關稅加碼。
中國輸美貨品近半已被加徵關稅，但10月中國對美出口仍增15.6%，估計係同出口商預計明年初關稅加碼而提前出貨，以及人民幣貶值有關。人民幣4月開始貶值，到10月底累計貶值一成，有助提升出口貨品嘅價格競爭力。不過，若關稅加碼，明年1月出口就會大跌。
市場擔心環球經濟放緩，加上觀望「習特會」，周一中港股市低開，其後滬指喺維穩政策下反彈1.22%，恒指則微升0.12%。避險情緒彌漫，資金再度流入美元資產，美滙指數衝破97關。意大利堅持超支預算案，意味歐元繼續走弱，亦變相有利美元走強，不利新興市場。
港股向來要睇中美股市面色，後市有個因素不容忽視，就係基金！美股標指10月跌近7%，創7年嚟最大單月跌幅；追踪對沖基金表現嘅HFRI FWC指數，10月跌近3%，亦創7年嚟最差單月表現。投資者若要贖回，需要45日通知期，換言之，11月15日左近，美股隨時出事！
美股要留意對沖基金贖回潮，A股則要留意私募基金清盤潮。據《私募排排網》數據，中國今年首10個月，有3,700隻以股票為主嘅私募基金清盤，當中63%提前清盤，係4年嚟最多，超過2015年A股股災時。若A股走弱，觸及基金嘅止蝕線同清盤線，基金將被迫沽貨，又會出事！
冧唔冧市，「習特會」係關鍵。現時可以做定功課，伺機低吸好股。友邦（1299）上周五公佈嘅季績對辦，第三季新業務價值增長17%，獲大行如野村、大和、滙證等睇好，維持「買入」評級同目標價。友邦現價63.65元，走勢呈現頭肩底同區域突破。
割柑人
本欄逢周二刊出