雖然區議會選舉明年先舉行，但不論泛民定建制都已經積極部署。八方聽聞，上年由民協轉投民主黨嘅莫嘉嫻有意轉區去九龍東，而莫嘉嫻就舉薦咗曾經參與立法會社福界選舉嘅「暗角打鑊」主角曾健超，出戰佢「老巢」九龍城馬頭圍選區。
舉薦出戰區選
上一屆區議會選舉，曾經連續4屆當選九龍城馬頭圍區議員嘅莫嘉嫻，被當年年僅24歲、民建聯嘅邵天虹擊敗，之後莫嘉嫻由民協轉投民主黨，又喺當區擺街站，唔少人都以為佢會繼續喺馬頭圍出選。不過，有消息人士同八方講，由於民主黨方面希望莫嘉嫻長遠可以轉區去九龍東，所以莫嘉嫻舉薦曾健超代表民主派出戰馬頭圍。
據了解，曾健超幾個月前已經開始喺馬頭圍服務，𠵱家會接手莫嘉嫻嘅地區工作，但佢唔會因為參選而加入民主黨或其他政黨。消息又話今次係民協同莫嘉嫻共同向民主動力推薦曾健超，而民主動力內亦無人提出反對。