噚日係雙11光棍節，不過沙田車公廟就反高潮，借11.11有「一雙一對、一生一世」之意，幫10對結咗婚23至43年嘅老夫老妻，舉行集體婚禮加持儀式，車公廟難得貼晒紅雙喜又擺埋木製花轎迎親牌恭候十對新人，仲有新人嘅下一代到場，陪父母搵番新婚嘅感覺，認真可喜可賀。
兩對聽障夫婦圓夢
聽障夫婦顏雲添同何煥英結婚23年，最初由男方對女方一見鍾情開始。顏生透露追煥英追咗足足一年，不停搵佢行街食飯睇戲，先至俘虜佳人芳心。佢哋拍拖一年半已經情定終身，當時顏生仲為咗靚老婆筵開20幾席宴請親友，不過有擺酒冇行禮，顏氏見今次有集體行禮儀式決定報名參加。
另一對聽障夫婦鄧強、陳麗珍結婚27年，姻緣來自鄧強鍾意笑，麗珍俾佢嘅燦爛笑容同樂觀性格深深吸引，最終齊齊墮入愛河。幫助兩對夫婦行禮嘅聾人協進會主任同八方講，以前婚姻儀式多數幫健聽人士籌辦，聽障人士好難有機會行禮，今次就係呢兩對夫婦人生第一次着馬褂裙褂，喺車公見證下圓夢，總算得償所願！
華人廟宇委員會文化及宣傳小組主席葉長清話，集體行禮係本年度廟宇文化節其中一項活動，委員會舊年先開始免費提供3間廟畀市民申請婚嫁活動，包括兩間法定古蹟──大坑蓮花宮同聯合道侯王廟，仲有沙田車公廟。咁即係嫁娶就搵車公、姻緣就求月老，華人廟宇委員會全包宴，各位單身狗唔知受唔受呢？
李八方