香港地人多車多，喺馬路上輕微碰撞吓，有時真係好難避免，冇人傷就當破財擋災，千祈咪好似元朗呢位私家車司機咁，喊打喊殺，仲扑爛人哋架車，結果咪搞到俾阿Sir拉咗囉！
話說讀者歐先生噚日上晝10點半，喺元朗教育路一間快餐店食緊嘢，目擊事件經過，一架中型貨車同私家車發生碰撞，雙方各有損毀，年約30歲嘅私家車男司機情緒激動，仲落車指罵貨車司機，對方疑被嚇到唔敢落車，一直坐喺司機位，點知私家車司機仲拎起硬物，扑向貨車。
警員持盾牌警棍戒備
「佢有郁手郁腳，另外3個男人之後嚟到，一齊喺度鬧。」歐先生形容，成班人鬧到七情上面，情緒幾近失控，但係就聽唔清楚佢哋鬧乜，好彩阿Sir好快嚟到，攞埋盾牌同警棍戒備，雙方一度對峙，「佢不停鬧貨車司機，警察都鬧埋，好激動」。之後有4、5部警車亦接報趕至增援，氣氛緊張，搞到咁大陣仗，引咗唔少街坊圍觀，雙方對峙約半個鐘，司機最後被押上警車協助調查。警員拉起封鎖線圍住涉事私家車，又戴埋手套檢查車廂有冇可疑物品。
歐先生認為，由於司機當時情緒咁激動，仲要叫多幾個朋友嚟「增援」，認為阿Sir出動盾牌同警棍係適當做法。
小記收到風，原來躁底司機係綽號姑爺偉嘅黑幫和勝和古惑仔，佢係勝和太上皇囝囝門生，喺元朗有一定勢力，冇咩人敢惹佢，個幾月前啱啱結婚，筵開40席，當時仲驚動警方反黑組到場。
警方表示，噚日早上約10時半，有貨車司機報警，指姓張（38歲）私家車司機用硬物擊打其貨車，警方列刑毀案處理，張涉刑毀被捕帶署。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。