就算鑑於主角仍然在生的家人虎視眈眈，根據屍骨已寒歌星生平改編傳記電影有所避忌，不得不口窒窒隱惡揚善，有能力本事將一個多姿多彩的樂壇妖星敍述到《波希米亞狂想曲》這般味如嚼黑膠，冇神冇氣悶出巨鵰來，也確實考功夫。冠着「水銀」藝名行走江湖的衣櫃皇后，當年多麼風光，不論初出道的迷幻長髮look，抑或後期肆無忌憚叨同志光的二撇雞肌佬造型，都成功在歌迷群中培植出一批楊麗娟，經漂白劑處理後簡直變成蠟像；加上情節蜻蜓點水語焉不詳，坐在戲院兩小時眼光光仰望空洞的銀幕，既不知道那幾個夾band的騎呢廢青如何走上成魔之道，也聽不出剪到支離破碎的主題曲有乜咁巴閉，高潮的Live Aid慈善演唱會盛況，又早已看過貨真價實的現場紀錄，水銀同學在天之靈大概除了嘆一聲遇人不淑，還會密謀迅速番生為自己平反──最好整死特朗普然後借屍還魂，駕輕就熟疾呼fake news。
勵志不是不可以，但請講清楚來龍去脈，譬如浪子回頭順便帶埋男友向屋企人出櫃那場戲，又虛假又突然，且不追究臨時拉伕怎麼可能交淺言深，當正三唔識七的陌生人係真命天子，嚴父慈母居然逆來順受，更有教壞細路之弊，入世未深的小朋友有樣學樣，周街搵條仔見家長，晌爸爸媽媽面前摸手摸腳，不即席釀成家暴血案先至奇。主角暗度陳倉搞基，編導以所謂平常心輕描淡寫，似乎頗受坊間影評人稱讚，一片「放下心頭大石」之聲，若無其事以這種速度開倒車，恐怕根本毋須在中世紀停站，直接回到石器時代。