近年日本等地興起燈光裝置展覽，以科技融入藝術，今年尖沙嘴海港城海運大廈就喺正門推出全球最大三角鏡影像萬花筒，全長16米、闊4.5米、高4.5米，香港市民唔使去外國，都可以置身光影表演中盡情「打卡」。
呢個三角鏡影像萬花筒每節燈光表演大約10分鐘，每次表演分為6幕不同場景，包括雪花、聖誕樹、彩紅隧道等聖誕元素，透過萬花筒正面及底部舞台專用嘅LED屏幕播放，輔以左右兩邊巨型三角鏡折射，營造夢幻效果。
三角鏡影像萬花筒幾時有得睇？整個活動將於今年11月14日至2019年1月1日舉行，即係話市民可以唔使等到聖誕就可以去，入場費收50元，但就係全數捐畀香港血癌基金，既可睇到精采燈光滙演打吓卡，又可以做善事。