效力薩爾斯堡嘅日本前鋒南野拓實喺周四對洛辛堡嘅歐霸盃賽事連中三元，成為史上第一位喺呢項賽事度大演帽子戲法嘅日本球員。今場正選上陣嘅南野拓實分別喺五分鐘、19分鐘同45分鐘各入一球，協助薩爾斯堡最終以5:2大炒對手。南野至今已經累積四個歐洲賽事入球。賽後南野接受球會官網訪問時對自己今場嘅表現感到自豪：「今日對我嚟講係值得高興嘅一日，好開心可以喺今場入波，幫到球隊全取三分，作為日本球員能夠喺歐霸盃完成『帽子戲法』更加令我覺得自豪。」
今次係南野拓實喺薩爾斯堡第二次大演「帽子戲法」，至於第一位喺歐洲賽連入三球嘅日本球員就係日本前國腳稻本潤一，佢喺2002年效力富咸嗰陣喺圖圖盃單場射入三球。