學生豪在倫敦讀碩士，兼職做宴會侍應，負責傳餐，其實佢在香港全無工作經驗，估唔到到咗外國，就為咗賺零用錢（學費住宿全由父母包辦），竟可放下身段，學咗兩三日就出席大場合，居然仲在Dorchester酒店宴會廳內，見過英國首相文翠珊與倫敦達官貴人㖭。講到底，兼職工大判頭會肯請外國學生做宴會侍應，當然係因為人手不足，到處事求人、英國白人、南亞裔、非洲裔都搵唔齊之時，唯有搵埋亞洲學生，識講英文者最優先。
學生豪話英國一旦脫歐，不准東歐移民到英國，都唔知去邊度搵人做基層工作如泥水、清潔、通坑渠、鋪電纜電話線等等行業工人。佢一次坐Uber，司機係印度裔，自言1990年二十歲單身到倫敦，工作二十年後已買咗屋，回家鄉娶老婆，現在一家四口住在倫敦外圍，坐火車約一小時到倫敦，覺得好幸福，對學生豪講：「其實我已經係中產，想培養兩個仔做醫生律師，冇東歐移民，邊個幫我屋企修理水喉廁所呀。早知會咁，我就唔投票贊成脫歐啦，最好再來一次公投，等我哋反對脫歐！」
好多人都係咁現實嘅嘞，一旦知得清楚冇人做低端而必要嘅職位，累親自己之時，思維立即改變。學生豪返到嚟香港，日日與同學出外「重聚」，到處去食飯飲茶，立即發覺周圍唔夠捧餐侍應，好多工人都係講廣東話帶外省口音嘅，同屋企人講起，佢爸爸話：「地盤雜工差不多個個都係鄉音人士或南亞裔，冇咗呢啲移民，沙中綫與公屋地盤唔慌有工人做下欄工夫。」目前一啲本土組織將每日內地移民配額150個視為洪水猛獸，樓價飛升之源，要求政府不准每日150人入境，眼光何其短視也。勞工及福利局局長羅致光當年報讀中大MBA，GMAT考試得分爆燈咁滯，當高官之後，講數字果然一針見血，係其他局長講唔到嘅。佢在10月28日網誌指出香港人口增加來源，1997年香港有649萬人，2017年有739萬人，增加咗90萬人，本土組織經常講每日內地移民150人，每年54,750人，20年就109萬5千人。但羅局長講，呢20年間香港人口自然增長48萬（出生減死亡），外傭增加20萬，已經多咗68萬，與每日150人無關，淨移民（移入減移出）係22萬，加埋就係增加90萬人，香港何來新移民壓力呢，如果冇咗新移民，香港今日更加搵唔到工人做嘢！山竹過後，大記者搵技工到屋企執漏，卒之等咗一個月，上星期先至有熟手技工幫忙，技工已50幾歲，冇徒弟，十年後，不知怎麼辦。