小賭怡情，大賭唔通真係會變李生咩，如果要借大耳窿去賭更加唔掂，俗語有話借貴利九出十三歸，猶如無底深潭。
互相追逐 擸凳狂「車」
早兩日網上流傳幾條短片，有大約6個男人喺澳門一間賭場入面互毆，事件應該係周三凌晨兩點幾發生，6個男人圍住賭枱你追我我追佢，跑嚟跑去，跑得唔夠快嘅，就俾人揮拳打到跌落地兼圍毆。混亂之中，佢哋推跌啲凳，有人仲攞起張凳係咁掟。最終有人報警，澳門司警趕到現場了解，拉咗4個人。
有讀者報料畀小記知，話司警初步調查相信事件涉及追數糾紛。事緣上個月31號，有一個姓陳嘅內地賭客因為輸咗錢，向兩個分別姓陳同姓楊嘅大耳窿借貴利，最後賭客連借嚟嘅錢都輸清光，懷疑冇錢還，俾人禁錮喺酒店，其間債仔搵機會走甩咗。到周三凌晨兩點幾，債仔同朋友喺賭場入面同嗰兩個大耳窿狹路相逢，大耳窿梗係追債仔還錢啦，雙方嘈起上嚟，最後仲大打出手，司警去現場調查之後拉咗4個人。