有人成日話愛字堆嗰啲親北京團體錢銀混亂又來歷不明，都儍嘅，人哋不知幾均真，數還數路還路㗎！好似高達斌（圖）創立嘅「愛港之聲」咁，畀印刷公司話佢拖數，7.1慶回歸遊行、吹奏粵曲欣賞會啲宣傳橫額、易拉架、單張等等全部未找數，搞到要去小額錢債審裁處告佢，追3萬幾蚊。
指郭美芳拖數14萬
八方仲心諗：愛國愛港喎，唔係講心唔講金㗎咩？邊位刁民咁大膽，慶回歸都冇面畀先？點知一查冊，間印刷公司大股東原來就係Gundam斌佢本人，唔通想自己告自己博出位？真係睇唔透。
八方即刻打畀Gundam問佢搞乜啦，佢認「係我間公司」，話愛港之聲舊年選咗新主席郭美芳，有14萬街數唔肯還，仲搬office改地址，擺明有心玩嘢逃避，中招嘅包括佢間樹人紙品印刷有限公司。
Gundam話喎，愛港之聲同樹人都唔係佢獨資持有，有其他拍檔，交完貨收唔到錢去告人好應份，純屬商業行為喎。