銅鑼灣商廈呎租有幾高？都唔使八方多講嘞啩，難得希慎廣場仲願意喺38樓天台，闢地8,000平方呎做「都市農圃」，仲一做做咗五年，旨在推動可持續發展，主席利蘊蓮公餘時仲會身體力行，化身「城市農夫」落田種菜，認真有心。
盛惠$40 限量75包
呢個星期六同日，希慎廣場會舉辦「樂與綠」派對，到時農夫團隊會喺天台收割真正「香港製造」嘅有機意大利生菜，然後送到希慎廣場4樓嘅Sky Garden有機菜檔公開發售。如果以地價計算，呢批有機意大利生菜可能係全港最貴嘅蔬菜，但更珍貴嘅可能係一班有心人嘅努力，希慎興業企業傳訊總經理董彥鈞透露早前受颱風山竹影響，農圃中唔少菜苗都被摧毀，農夫團隊同一班員工、義工惟有急急重新落種，務求趕及活動時有新鮮菜推出，等市民一嚐farm to table（農地到餐桌）嘅清甜鮮味。有機菜限量75包，40蚊一包。
與此同時，希慎興業仲邀請一班喺共享工廠空間「合廠Hatch」工作嘅本地基層婦女，將啲有機蔬菜吉祥物製成超萌攬枕，喺「樂與綠」派對同場發售，有機生菜同攬枕義賣所得收益扣除成本後，會捐畀樂餉社（Feeding Hong Kong），齊齊對抗飢餓。