好多人都想試吓坐開篷車嘅滋味，小記怕吹亂頭髮，所以從來都唔恨！元朗呢位小朋友，似乎太想坐開篷車，不惜冒生命危險，將個頭伸出私家車天窗，司機竟然冇阻止，真係睇到都覺得牙煙！
話說讀者阿仁，噚日揸車途經元朗安寧路時，從倒後鏡望到後面架私家車，有一位年約8、9歲嘅男仔，企咗喺副駕駛座，仲將個頭伸出天窗，「個男司機冇阻止佢，仲一齊笑得好開心㖭，個司機年紀有啲大，未必係細路個爸爸。」
司機縱容 冇扣安全帶
當架私家車去到媽橫路爬頭之後，阿仁車上嘅朋友就拍低驚險嘅一幕。從片段可以見到，個細路一時企喺度，一時又坐咗喺副駕駛座嘅頭枕上面，稍為縮返個頭入去，然後又即刻伸返出嚟，全程都望住出面嘅風景，一臉享受。阿仁認為，就算細路仔唔識嘢，做大人嘅都唔應該容許佢咁做，「佢冇扣安全帶，如果突然煞車，佢可能會碌落嚟被車死。」