「每個人都有佢嘅大運，只要你不放棄！」
劉嘉玲可以說是同期女星中最勤力一位，每個星期都會見到她，新片不斷、內地真人騷做評判、舞台劇等，堅持向前的35年演藝人生路，她謙稱機會多，但真的自豪得起，「比上不足，比下有餘啦，我一直都有機會，但真係有實力嘅人，先可以行到𠵱家，路遙知馬力。」
採訪：林妙萍
攝影：周樂恒
服裝提供：Etro
劉嘉玲上月和梁朝偉一齊去北海道欣賞紅葉，以為是結婚十周年紀念旅行，真相並沒有這麼浪漫，「唔係啦，唔使啦，變咗屋企人啦。今次有朋友一齊，我哋今次自駕遊，沿住北海道邊陲，每到一個地方就行山，住吓酒店，喺車內傾吓偈、聽吓音樂，睇吓風景，我覺得好peaceful。」嘉玲經常一個人行山，欣賞大自然變化，「我都希望佢愛上行山，但好彩佢好enjoy做司機。」
從鄧永鏘啟發
當年嘉玲和梁朝偉在冷門的不丹結婚，婚禮早就舉行到世界邊端。嘉玲愛四處遊歷，她人生的bucket list還有許多地方：「近期最想去挪威睇北極光，仲有土耳其。我問過David Tang（鄧永鏘），佢話有諗過如果外星人嚟，會帶佢哋去邊十個地方，我記得有耶穌揹十字架嘅耶路撒冷、中國萬里長城、金字塔，都係人類進化史，我覺得要去睇、要去見識，世界點解會發展成𠵱家呢個世界。」
近年將興趣變成副業，出洋酒品牌、個人服裝系列，嘉玲最愛依然是行了35年的演藝事業路。年初首次監製兼主演禁忌師生戀題材電影《以青春的名義》，之後秦沛、謝君豪合作舞台劇《奪命証人》，上月又有電影《狄仁傑之四大天王》。「前嗰15年呢，我都唔係咁有自信，由化妝、着衫方法、做戲，都係做一啲討人哋喜歡。因為我未搵到真真正正嘅人係點樣。之後，慢慢成長，行過嚟，慢慢認識咗自己、知道咗自己點樣係最好，當你有信心，做任何嘢都會順利好多，得心應手好多。」
朋友叫拍自傳
由90年代電視台歲月，到港產片盛世，以至合拍片、真人騷，嘉玲坦言遇上黃金歲月，「比上不足，比下有餘啦，我一直都有機會，由畢業到𠵱家，一路都未擔憂過工作。每個人都有佢嘅大運，只要你不放棄！真係有實力嘅人，先可以行到𠵱家，路遙知馬力。」有否想過拍自傳？「身邊好多朋友叫我拍，連片名都幫我諗好咗，叫『我的未來不是夢』，都幾好，等我諗吓。」人在江湖，要兼顧不同方面，「將來我會拍，或者俾人拍，到時先將我嘅事，詳細啲講畀大家聽。」
嘉玲出名朋友多，義氣仔女，別人叫到總會幫忙，如何拒絕原來也是她學習中的人生課題，「因為我都來自草根，都經歷過好多困境，我覺得生活係唔容易，每個人嘅生活都唔容易，如果可以令到人哋滿足、快樂，我會盡量去做。」屈就勉強不難受？「我都會㗎，所以𠵱家呢個stage，我都會say no，起碼要自己舒服先得。我同梁生都要平衡吓，佢又要學識出嚟見吓大家，我又要學識say no！」
人生聖經《紅樓夢》
「人生必需要睇嘅書，第一本係《紅樓夢》，《紅樓夢》就好似一本人生聖經咁，所有人生道理、規矩，所有嘅奢華與落漠、所有明爭暗鬥，都喺呢個世界中，所有問題你都可以喺書上學到，每個階段睇，都會有唔同體會。」嘉玲說，另一本則是《傲慢與偏見》。
更多精采時尚內容，盡在 http://add.appledaily.com。