龍翔道向荃灣方向近畢架山花園噚日朝7點幾發生嚴重交通意外，有路經車輛車cam拍到成個意外過程，片段見到一架掛P牌電單車行快線，其間因前車減速而收慢，電單車後面架七人車都收油，當時電單車司機仲擰轉頭望一望，就喺佢望返前面嗰陣，七人車突向前推，撞跌電單車，電單車司機被撞飛，再被駛前的七人車捲入車底，鐵騎士成面都係血被困。警察調查發現原來係後面有客貨車同私家車來不及煞車，一架撞一架造成五車相撞。
當時有一個金髮外籍女人揸車經過，佢車上有急救包，即刻落車跑去睇吓個受傷司機，又安慰佢；消防員亦好快嚟到唧起七人車救出傷者，佢送院嗰時仲清醒，但身體多處受傷，情況嚴重。
聽講32歲姓蔡嘅傷者本身係田螺車司機，揸咗10幾年車，有兩個仔女，最近考到電單車牌方便揸車返工。五車相撞順序為電單車、七人車、的士、私家車同客貨車，夾喺中間嘅的士，車上女乘客覺得唔舒服要送院治理。