豬年維園年宵競投噚日輪到競逐主題檔同乾貨檔。今年氣氛較上年熱烈，唔少檔口嘅成交價都比上年升咗好多，令每年例必會係年宵擺檔嘅政黨同政治團體，難免要畀多啲錢投，但最肉赤相信非支聯會莫屬。
攤位貴上年七成
支記每年年宵必定投近天后的1、2號相連檔位，今年佢哋要用57,700元先投到，較舊年33,100元，貴咗7成，不過支記擺開呢個位，市民熟晒路，就算貴一貴都要投。副主席蔡耀昌（圖）話，出年係六四事件嘅三十周年，佢哋都設計緊相關紀念品擺喺檔賣，又透露搵緊地方重開六四紀念館，希望大家多啲支持。
至於民主黨同公民黨就好啲，分別以46,900同57,000元成功投檔，民主黨話金額同上年差唔多，而公民黨都話金額係預算之內。
社民連舊年以777和689字尾叫價，噚日副主席黃浩銘就以11同25字尾叫價，最終以33,225元投得1個乾貨檔，價錢比上年貴咗少少。阿銘話咁叫係有特別意思，想呼籲大家11月25號嚟投票，話冇一個選舉係比呢個更重要。
除咗政黨同團體，年宵競投吸引到唔少後生仔女參加。小西灣衛理中學中五蔡同學用咗17,777元成功投檔。雖然都係777字尾，但佢笑住話咁叫係唔關林鄭事，只係想博人哋反應唔切，唔識嗌價，出奇制勝箒。佢話年頭擺檔時發現大嗌口號反而嚇親人，靜靜地坐喺度食飯，就有人自動行埋嚟。他講笑話下年要喺檔口食埋下午茶同消夜，以奇招吸客，希望唔會好似今年咁損手離場。