消防處噚日推出真人扮演嘅吉祥物「任何仁」，並喺網上迅速爆紅。不過港台《視點31》噚晚就話收到消防處內部消息，指真人版「任何仁」將從此消失，以後只可以卡通人物形式出場，禁止真人再扮，其中原因係「有違正面英雄形象」、「意識唔係咁好」。
只能以卡通人物形式登場
《視點31》主持喺節目中話，向消防處內部打聽過後，發現「任何仁」真人版宣傳片，係由消防處救護組部份人員構思同拍攝，藍本出自9個月前，消防處一幅宣傳心臟除顫器海報嘅藍色公仔，當日救護組部份人員拍攝真人版「任何仁」時，特登搵咗個肥少少嘅人扮，因為覺得喜感會大啲，而為帶出任何人都可以救人訊息，所以專登蒙面唔出樣，前日大家睇到嘅「任何仁」，露面前已經過幾次修正，點知一出場即引起社會咁大迴響，令消防處高層始料不及，內部評價好壞參半，有人覺得「玩得太大」喎，所以下令禁「真‧任何仁」再出現，只可以卡通人物形式出場，八方問消防處有乜回應，但截稿前未有覆。
雖然消防處高層被傳下令封殺真人版「任何仁」，但大家似乎意猶未盡。「任何仁」除咗噚日成為相機廣告主角，「香港紅十字會」更令「任何仁」流出第一滴血，喺面書貼出一張「任何人」進行血紅素測試嘅相片，呼籲大家捐血，香港天文台亦借「任何仁」宣傳「世界天氣資訊」網頁。至於最眼利嘅，一定係「綠色和平」，事關佢哋發現，「任何仁」早喺2016年已經現身過喺「綠色和平」宣傳片，扮演「微塑膠」一角，藉此呼籲大家一齊走塑，救救環境。
唔知一班消防處高層睇到「任何仁」咁受歡迎，會唔會收回封殺令，容許任何人都可以扮演「任何仁」?
李八方