18歲就可以考車牌，但因乜解究呢位哥仔，唔考牌就去揸車，唔通係出於對駕駛嘅熱愛？但最終搞到阿Sir拔搶咁大件事，就真係玩大咗喇，而借車畀佢嘅朋友，差啲都搞到一身蟻。
答應賠償反口
話說周一晚8點幾，讀者劉先生喺沙田瀝源街娛樂城對開停低架車，前方有架黑色私家車，當架車切線駛出嗰陣，將途經嘅電單車撞倒，好彩鐵騎士冇受傷，可以自己起返身，當時肇事嘅18歲司機落車了解，劉先生聽到，18歲司機應承賠償一千蚊了事，但朋友嚟到駛走架車之後就反口，仲話：「你都冇受傷，我唔賠呀，你報警囉！」鐵騎士於是就報警。
劉先生話，原本架車唔係個後生仔揸嘅，「開頭由另一個司機揸過嚟，再交畀佢，佢喺警察到場前，將身份證畀咗個朋友拎走。」劉先生唔明個後生仔點解要咁做，仲話警員調查時，個後生仔突然逃跑。
小記了解過現場消息，個後生仔最初向警員表示，自己停緊牌，所以冇帶車牌喺身，又冇帶身份證，警員覺得佢有可疑，於是加以盤問，點知個後生仔突然拔足狂奔，跑至幾十米外嘅賽馬會游泳池對開時，仲走咗入小徑唔見咗人。但唔知點解，過咗一陣佢又突然撲出，仲迎面跑向阿Sir，佢當時拎住個袋，阿Sir離遠見到佢手上嘅不明物體，即刻拔槍警告，最終個後生仔束手就擒。
據知，嗰位姓譚嘅後生仔，向阿Sir聲稱較早前用假駕駛執照，問姓李嘅朋友借車，警方之後喺火炭崗背街搵番架私家車，當時車上冇人。而個後生仔涉不小心駕駛、行使虛假文書、駕駛時無駕駛執照及沒有第三者保險下駕駛等四宗罪被捕。至於仲有冇其他內情，警方都仲調查緊。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。