消防處噚日開記招，介紹新成立嘅社區應急準備課，不過呢個記招畀佢哋嘅代言人「任何仁」亂入提高消防意識同埋示範急救搶晒風頭，佢由頭包到腳嘅藍色緊身衣，外形同設計認真低成本加騎呢，所以一出立即畀網民恥笑抽水，話似日本AV入面嘅隱形人，有網民仲話「任何仁」加埋大嘥鬼、滴惜仔、清潔龍，仲有房屋署冇乜人記得嘅吉祥物、成個雷神索爾咁嘅「房護俠」，大可組隊「特區政府復仇者聯盟」！
其實「任何仁」喺今年8月已登場，當時消防處推出一條名為【真‧羅蘭X擊活の人心——靈異篇】，邀請羅蘭係盂蘭節以輕鬆手法教導心肺復蘇法，而「任何仁」亦於當日首次露面。雖然有網民覺得「任何仁」太騎呢太低成本，但據八方所知條片由構思到拍攝，都係由消防處救護組人員一手包辦，佢哋都估唔到「任何仁」一現身即成網絡紅人。
「任何仁」噚日唔單止成為fb洗版主角，仲成為網民二創目標，好似李卓人團隊就玩食字，話「任何人」都要投票支持佢；香港PlayStation係fb出po，以「PlayStation公民教室」為題，叫「任何人」打機都要有防火意識，唔好長時間開着部機！
英文名叫Anyone
任何仁仲係fb出po，話多謝大家關注，仲答網民問佢係乜人，「任何仁就係每一個人，英文名叫Anyone」，叫市民要準備做個任何仁，隨時準備救自己家人同身邊人。
佢之後仲喺個po加一大堆hashtag，話各行各業都要準備好救人、叫網民惡搞不忘報course擊活人心等住你，仲話大家諗多咗喇佢邊有資格做消防處吉祥物吖！又話噚日成日打乞嚏係時候要唞唞喎！